لَو ظَل مَطرَح
كُنت عَليه فَلِّيت
رَيَّحت بــــــــــالـــي
وْبِالشِّعِر غَنِّيت
عَ حفاف نجمِه
هيكي تْمشِّيت
وِارتحت من
هَالحبسِه يا ريت
يـــــــا ريت وينـتــــا
عَمَّرتلـــــي بيت؟!
***
يا ريت بَقدَر
أطلَع بِالعيد
عا "طابا" يا أيَّ
بَلَد جْديد
وِنْشَعِّل الكانون
بِشي وَعرَه
ما نْرَوِّح غير
آخر السَّهره
نِرتاح من
هَالحبسِه يا ريت
يـا ريت وينتا
عَمَّرتلي بيت؟!
***
مِشتاق لقَعداتنا
بْمُنتزَه هوشِه*
قدِّيـش كــانت
حلوِه هَالعيـشِه
مِفلح، وْناجي،
جَميل، وْحَدَّاد
أيَّــــــام عَ بالــــــي
كْثير عم تِنعـاد
كل ما عَهوشِه
هيكي مَرِّيت!!
***
يا عيني عا قَعدِه
في حُرِش ميعار*
أنا وِصْحابي
بْرِحلِة المِشوار...
حـــازم، وْفَتحـــــي،
فوزي، وِكْثار
سَقا الله نِطلَع
من حَبِس هَالبيت
وِتعــود أيَّـــــــــــام اللقـــا
يـــــــا ريت...

*هوشِه وميعار: قريان فلسطينيَّتان هُجَّرتا سنة 1984 تقعان في غرب الجليل الأسفل.

 موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان alarab@alarab.com