صعلوك-سيمون عيلوطي

إتْرِكينــي مَــــرَّة
فـــي حالــــي
نِفسي أعمَل
إللي فــــي بالـي
أنْجَن...
أرمي نَفسي مِ العالـــي
أروح مَطـــرَح
مـــا بْيِحـلالــي
وْلا حَـدا
يِسألنـي شـو مالـي!!
***
إتْــرِكيــنــي يـــوم
عــــا فــالـــي
لا تْسَــــــكِّري لِــبْواب
لـِ قْبـــالـي
عـــــا كيفــي غَــنِّي
أوف مَوَّالـــي
عَ الظُّهْـــر خَلِّــي
نِجمـــــي يْلالــي
سَعـدان أتعَـربَـــــش
على حْبـــالــي!!
***
إتْــرِكيــنــــي فِـــلْ
لَـــوْ مَــرَّه
أروح صوب سَـــمرا
يـــا شــقرا
أطلَع عَ دَغشِه
بين هالحَقلات
هيكي أمشي
أخربِط القَمحات
أقطُف شِ كَمشِةْ
تين للحِلوات
خَلِّيني أعمل شو
في بالي ...
***
بِدِّي أتصَعلَك
بِشي صحرا
مــــــا خَلِّي نُقطِةْ مَيْ
فِ الجرَّه
وَصحَن لَعينِك ...
مِ الكاربا* كُحلي
وْخَلِّي الصَّبايا ليكي تْمَلِّي
عْطور تُسكُبها
عَ هودَجِك*
يْزِفوكي في موكَب حلو
وَنا مَعِك ...
بْلَحظَه إنْتي قْدِرتي
تِقلِبي حْوالي ...
حِلِّي عَنِّي بِدِّي فِلْ
أروح لَحالي!!

*الكاربا: نوع من أنواح السَّبح، أو المسابح الفاخرة.
*الهَوْدَجُ: مَحْمَلٌ يُوضَعُ عَلَى ظَهْرِ جَمَلٍ لَهُ قُبَّةٌ تَرْكَبُ فِيهِ النِّسَاء.