الممرضة النصراوية نوال علي عمر:

حالي حال كتير من الطواقم الطبية بس اكيد رح نمرق هاي الازمة
شكرا لكل حدا ماخذ الموضوع بجدية 
شكرا لكل حدا ملتزم وعم بضل ببيتو شكرا عالدعم على التسفيق على الصبر
بقيت في العمل لاجلكم ، ارجوكم ابقوا في البيت لاجلنا

رسالة مؤثرة وصلت إلى "كل العرب" من الممرضة النصراوية نوال علي عمر والتي تعمل بمستشفى ايخلوف في تل أبيب، وحالها كحال جميع أفراد الطواقم الطبيّة في مستشفيات البلاد الحكومية، والذين يعملون ليل نها ويعرّضون أنفسهم للخطر في سبيل سلامتنا وصحتنا في ظل تفشّي فيروس كورونا المستجد.

الممرضة النصراوية نوال علي عمر

نوال التي حدثتنا برسالتها عن ظروف عملها، الصعوبات التي تعيشها والضغوطات والخوف الكبير في ظل تفشي الوباء الذي يفتك بالعالم، لخّصت رسالتها للمواطنين بجملة واحدة، لكنها معبّرة ومؤثرة وهي:"كل بقيت في العمل لاجلكم.. ارجوكم ابقوا في البيت لاجلنا".

إليكم رسالة نوال كمال وصلتنا:"يعطيكو العافية جميعا، من اسبوعين تقريبا عم اجي كل يوم مشي من بيتي برمات چان للشغل بمستشفى ايخيلوڤ بتل ابيب ، اليوم نزل مطر وكل اواعيي وبوطي الشغل مليو مي ، بيني وبين حالي بقول بهمش فترة ورح تمرق بس عشان عم افكر انه اذا لا سمح الله انعديت بالڤيروس بحالة طلعت بالمواصلات العامة معظم الممرضات رح يفوتو بحجر صحي والقسم رح ينهار خاصة انه في نقص بالممرضين والممرضات .
ولانه بفكر اذا لا سمح الله صار وانعديت ، اطفال بلا جهاز مناعة الي عم اشتغل معهن رح يتدهور وضعهم اكتر مما هو متدهور . خاصة لانه في نقص حاد بالاجهزة الي تكفي كمية المرضى .
ولانه فكرت باهلي ابوي عندو ازمة (אסתמה) وعندي اخو صغير عندي عيلة الي صلني تقريبا تلت اسابيع مش شايفتهم .
عم انجبر كل يوم تقريبا اروح وارجع لمدة ٢٥ دقيقة ، عم اطلع وانزل درج ١١ طابق كل مرة مضطرة اروح فيها عالشغل ، بس عشان بهمني صحتكو وعافيتكو صحة اهلينا احبابنا اصدقائنا .
قد متكونو مضغوطين ومستائين من الوضع ومن الاجرائات الي عم تسنها وزارة الصحة اعرفو انه احنا عم نتعرض لضغط اصعب بكتير عم نضطر نضل حاطين الكمامة لمدة ٨ ساعات وبعض المستشفيات والاقسام ١٢ ساعة، عم بشوف ممرضات امهات عم يعانو لانه اطفالهم بالبيت وعم ييجو عالشغل !! نساء حوامل عم يعرضو حياتهم وحياة الجنين للخطر ، احنا بمعركة كلنا الجيش فيها ويا منكون قدها يا رح ننهار وانا متأكده انه احنا قدها .
حالي حال كتير من الطواقم الطبية بس اكيد رح نمرق هاي الازمة
شكرا لكل حدا ماخذ الموضوع بجدية
شكرا لكل حدا ملتزم وعم بضل ببيتو شكرا عالدعم على التسفيق على الصبر
بقيت في العمل لاجلكم ، ارجوكم ابقوا في البيت لاجلنا"، إلى هنا نصّ الرسالة.