العيلِة كانت من قبِل مبنِيِّة عالإلفِة 
والكُل بيُقعُد سوى وِبيِحــكوا حَكاوي
وكانــت اللَّمِّـة تِجْمعـهُم معَ اللَّهــفِة 
بروحِ المحبِّــة اللّـــي فيـها طَــراوِة 
وكانت العيلِـــة تعيــش في غُــرفِـة 
وكان الأبو لاوْلادُه بالقُصص راوي
ويتبادلوا النُّكتِة مع بَعْض والنّهفِــة
بقْلوبــهُــم طيبَــة طَعمِـتــها حــلاوِة 
بمــزْحِ ومَرَح ولَطـــافِــة مع خِــفِّة 
ومْناقَرَة مع بعض من دونِ قساوِة 
وِإن حدا عاكَـس بياكُــلُّه شي كَـــفِّ
تَيِرجع لَبَيُّه طالب منّو الرّضــاوِة 
وكان عِنّا الصغير منِ الشُّــغُل مَعفـي
معَـــوَّد عالدّلال مَحظـوظ غَـلاوِة 
وشرابنا في الصّقعَة شاي مع قِرفِـــة 
وعَجَمْر هالكانون مِنقــيم المَشـاوي
وفنجان منِ القهوِة وِبْرَشفِـــةِ الشّـِفِّـة 
بِتْعَدِّلِ الأفكار وِأمــورنا بِتــساوي
ومن طبخِةِ الجاجِة الكُلّ بيِلحَقُه نِتفِــة 
عَقَدّنا كُنّا نعيش وبالقِلِّة مَبسـوطـيـن
ونسهر ساعات اللّيل وقنديلنا ضاوي

 موقع العرب يفسح المجال امام الكتاب لطرح أفكارهم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net