في الحارة الشامية
خلعوا الباب
وتفرقوا الأحباب
وجفت دموع الياسمين الشامي
وما عاد يعرِّش على الحيطانِ
والإنسان ما عاد أخو الانسان

في الحارة الشامية
البيوت عششت فيها الغربان
والشبيحة والخوَّن هدموا الديوان
وبأمور الحارة صاروا يحكو الغلمان

في الحارة الشامية
هبت رياح السموم
والزعيم مات بخنجر مسموم
والعقيد مات شهيد
والغريب صار قريب
والقريب صار بعيد

في الحارة الشامية
هدموا الجامع وسكروا الكتاب
والداية ما عادت بشَّرَت بالاولاد
والبلاد ما عادت بلاد

في الحارة الشامية
الحكواتي ما عاد يحكي
في الليالي
عن ابو زيد الهلالي
وعن عنتره
وحكاياتو كلها صارت
عن البسوس وعن داحس وعن الغبره

يا أهل الحارة
لا تبكوا ولا تزعلوا
الدنيا دوٌارَه
والحارة الشامية إلها رجاله

يا أهل الحارة
اسألوا اليرموك وخالد
عن حطين وعن صلاح الدين
وعن الطاعون وعن وميسلون

يا أهل الحارة
اصبروا ولا تيأسوا
"الي بيتحده هذه الحاره منو قده
بالحاره رجال بيحموا حدّه" 

موقع العرب يفسح المجال امام المبدعين والموهوبين لطرح خواطرهم وقصائدهم التي كتبت بقلمهم المميز ويقدم للجميع منبرا حرا في التعبير عما في داخلهم ضمن زاوية منبر العرب. لإرسال المواد يرجي إرفاق النص في ملف وورد مع اسم الكاتب والبلدة وعنوان الموضوع على العنوان:alarab@alarab.net