هذه القصيدة الزجلية من الوالد عزمي حبيب الله "ابو الشادي "عين ماهل
مهداة الى الابن الغالي الدكتور: شادي عزمي حبيب الله
بمناسبة التخرج من كلية الطب والجراحة في جامعة العلوم والتكنولوجيا
في الاردن..الف الف مبروك...

إلى شادي بمناسبة التخرج
بِأَرض العين اشْرَقََتْ شمسِ الأصيلْ ونوّرتْ عالنّقبْ.. والمثلث والجليلْ
شَمَخْ شادي تا يعانِقْ نورْها واعْتَلى فوقِ الثريا والنجم الجميلْ
عا ثَرى جبل سيخ فاحتِ زْهورْها عَبَقْ زيتونْها وتْرابْها النّسْمِ العليلْ
خَيّمْ عليها النّدى تايْشِمّ عْطورْها ويشرب مِنِ عْيونْها ماءِ السلْسبيلْ
تْعَرْبَشْ ما بين خْيوطْها وِشْطورْها تا يقطف النجمات مْنِ الكَوْنِ الجليلْ
حَلّقّْ على جْناحِ صْقورْها وِنْسورْها حتّى يْنولِ المُنى وِالْعِلْمِ الأصيلْ
**********
بِأرْضِ الْهاشِمي الْ كُنْتِ تْزورْها لْجامِعْةِ العُلوم هْناكْ.. شدّيتِ الرّحيلْ
مرّتْ عليكْ بِسْنينْها وِشْهورْها مِثِلْ لَمْحِ الْبَصَرْ وِالرِّمْشِ الْكَحيلْ
راجِعْ بَعِدْ غُرْبِه إلّلي انْتَهى دورْها على اوْطانَكْ اليومْ..عازِمْ هالسَّبيلْ
عَمَّتِ الْفرحَه بِقْلوبْنا وِحْبورْها فِرْحوا الأحِبَّه فيكْ.. وِالْخِلِّ الْخليلْ
فَجّرْ بوشادي قوافي الشِّعر وِبْحورْها وْخَلّي دْموعِ الْفَرَحْ عالْخَدِّ الأسيلْ
*************
بيدَكْ شْهادِةْ طبيبْ.. وِحْضورْها مِثْلِ الْحامِلِ سْلاح مْنِ عْيارِ الثَّقيلْ
فيها تْحارِب وْجاعِ النّاسْ وِشْرورْها تا تِشْفي هالْعِلاّتْ مْنِ الْقَلْبِ الْعَليلْ
داوي جْروحِ الْبَشَرْ لوكانْ مَقْدورْها تعيش الألم والجرحْ باْلجِسْمِ الهزيلْ
تْزَيِّنِ الأوْطانْ كل إيناثْها وِذْكورْها يِتْفاخَروا بِأرْضِ الْعينْ جيلْ وجيلْ
حامِلْ شهادِه مْوَقَّرَه وبالعِلْم مَنْثورْها مثلِ الْعُطر مرْشوشْ عالْورْدِ الْجميلْ
على البرْدى.. بِتْسَطَّروا سْطورْها بِحْروفْ مِنْ ذهب أوْ ماسْ مَلْهُمْ بديلْ
*************
غوصْ يا ابْني بْأَنْهارِ الدِّني وِبْحورْها طولِ اللآلئ والْجواهِرْ وجيبِ الدَّليلْ
وُاعْبُر حدودِ الدِّني وكلِّ جْسورْها دَرْبِ الْعلم وِالْمَعِرفِه دومًا طويلْ
إِبْنِ البلد بِتْظَلّ طيرمْنِ طْيورْها تْغَرّدْ وتِنْشِدْ على اغصانِ النّخيلْ
ترقصِ الْبلابلْ عَغْصانْها وعصْفورْها يْغَرِّدْ.. وْتِسْمَعْ مِنْ حمايِمْها الْهديلْ
على حْدودِ السّما تْحَلّق صْقورْها تحمي حما الأوطان منْ كُلْ عدو دخيلْ
اعْتلي فوقِ الأصايِلْ وارْكبِ مْهورْها حتى بْرحى العِلِمْ.. تُهْدُرْ بِالصّهيلْ
*************
رايْتَكْ بإذن الله مْعَزّزِه بِسْرورْها للْبالْ .. يِمْحي مْنِ الْقلبِ الْهَمّ الغليلْ
خفّاقَه فوقِ الْجَبلْ لَوْ مَرّوا دْهورْها تْرَفْرفْ عَبر تاريخ هَالْعينِ الطويلْ
خلّيك شامخْ مثل سنديانْها وزَعْرورْها تْفَيّا تَحتْ أغصانْها الظلّ الظّليلْ
سْيوفِ العلم مَتعرفْ خبايا مَسْتورْها بْوَجْهِ الجَهِل سِلْ هالسّيفِ السّليلْ
ُقدّامْ أهْلِ الجهل ما تصمُدِ صْدورْها حينْ ما تِسْمع مدى صوتِ الصّليلْ
*************
حافِظْ على حْساسِ النّاسْ وِشْعورْها بْتِبْقى عَطولِ الْمَدى وِشْعورَكْ نبيلْ
دارْنا هالعينْ.. ما يِنْكسرْ بَلّورْها مْعَمّرَه باذْنِ الله وِجْذورْها ما تِزيلْ
مَتْهِمّك ملذّاتِ الدّني وِغْرورْها وِاهْتدي بْسيرةْ نبينا وارْضى بالْقليلْ
رْسالِه شريفِه مضمونْها ومَنْشورْها فيها بلاغه وْحِكَمْ وِالْمعْنى الْجزيلْ
*************
خلّي التَّواضُعْ بالنّفْس كَقْرورْها هيك علّمْنا النّبي عالْخُلْقِ النّبيلْ
إمشي بْخُطى الإيمان سَيْرْها وِعْبورْها بيكونْ مِثْلِ الأسد والنُّوقِ الذميلْ
اهْتدي بْتَقْوى الله إلْ نَصْ دستورْها بِِكْتابْ هالْفُرقان إلك.. أفضلْ زميلْ
خَلّي طُموحَكْ للسّما ومقدورْها دَرْبِ الإرادِه أبدْ ما يِعْرَفِ المُسْتحيلْ
خلّيك مِثْلِ الشّمس ساطِعْ نورْها مثْلِ القمر وِهْلالْ.. بِالشّهْرِ الْفضيلْ
يا فَخِرْنا فيك.. وْرِضانا عليكْ كْثيْر تْعيش بْرِضا النّبي وِالرّبِّ الْوَكيلْ
*****************

موقع العرب يفسح المجال امام المبدعين والموهوبين لطرح خواطرهم وقصائدهم التي كتبت بقلمهم المميز ويقدم للجميع منبرا حرا في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع على العنوان: alarab@alarab.net