مِتْل الحرِف ..
مَ يْفارق الكلمِة
مِتْل الوتَر..
ملهوف للنغمِه
وْمتل البريق
مْعلَّق بْنجمِة،
-هيكي أنا
يا بسمِة وْجودي
موجود فيكي
وانتي موجودي
في كاسي
في صحواتي
في حلمي .

***
مِثْل الطيور
العاشقَه النسمِه
مِتْل القلوب
الهايمِه بْبَسمِه
وْمثْل الندى
عَ شْفاف شي وردِه
مشتاق وصلِك
وانتي في حدي
ضُمِّك عَ صدري
مَ احلى هَالضمِّه .

***
كيف الصُّبِح
محتاج نور الشمْس
كيف الغِوى
محتاج حنين وْهمس
إحنا سوا...
والحب فينا هام
مِثْل الوَعِد
مرهون بالأحلام
صُرْتي الفضا
وْقلبي بْمداه ...
نجمِه .

***
قَبْل ما نِلْفي ...
عا هالكون
كنَّا سوا
في غنوِة الحسّون
مْواج الندى
تِنْعَفْنا عا بستان
فِيّيو الهَنا
فِ قِلوبنا ألحان
نَغْماتو صارت
إسمِك وْإسمي .

موقع العرب يفسح المجال امام المبدعين والموهوبين لطرح خواطرهم وقصائدهم التي كتبت بقلمهم المميز ويقدم للجميع منبرا حرا في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع على العنوان:alarab@alarab.co.il