العاده صبحت عباده

ولقيت في كراكيبك سعاده

بتونسك في الكنه بنت الزنه

بنت الذينه

عودت نفسك تعيش

وتقصقص الكرانيش

وتصنع من القليل زينه

لحد لحظه وصولك

متلاقي نفسك بطولك

وسط الزمن ثابت

ولان طبع الزمن دوار

يبقي الخلاص في الزار

وفي التفئير

ايه لزمته التفكير

لو النفوخ منفوخ

بقالب طوب

لو في الخضوع معصوب

لو في الصور مصلوب

ايه لزمته

لو كنت واهب حياتك

لانتظار الموت

لو شيلت حبل الصوت

وعملت بيه مشنقه

لو الرضا شرنقه

دامت بدوم الشقي

في ساقيه المحاسيب

. العجز له اساليب

بتتسمي باسم الظروف

مره يكون مكسوف

ومره قال عالخوف انه الامان

وفي لحظه الهزيان

اعترف بانه جبان

وبانه لسه في انتظار

الشجيع

من قلب جمع الجميع

من قلب هذا المكان