- ابرز ما جاء في الرسالة :

* قبل اكتر من سنة انخطبت لشاب منيح كتير وعمرو 25 سنة 

* خبيت عن خطيبي وحبيبي سر كبير وما قلتلوا غير قبل عرسنا بشهرين اني محروقة بمحل حساس بجسمي

* من صدمة خطيبي ومن غضبوا اتجرأ ومد ايدو علي وضربني وصيح علي بطريقة مش طبيعية وتركني وراح 

* انا كتير حيرانة وخايفة اني اخسروا وخايفة اني ارجعلو وما يرضى في ميشان الحرق...وخايفة اني اذا ارجعتلو اعيش معذبة كل عمري 

وصلت الى موقع العرب رسالة من شابة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة كالتالي : 
 مرحبا موقع العرب انا صبية عمري 19 سنة حلوة ومش ناقصني ايشي , قبل  اكتر من سنة انخطبت لشاب منيح كتير وعمرو 25 سنة , تعرفنا على بعض عن طريق الصدفة وكنا بعلاقة لمدة شهرين وبعدها اجا وخطبني وتم كل ايشي عخير .
انا الصراحة ما بخبي عنو ايشي وصارحتو بكل ايشي بحياتي , ما عدا شغلة وحدة ووحيدة خبيتها عليه ! لحد ما قرب عرسنا يعني قبل العرس بشهرين قرررت اني اصارحو فيها لانو عرسنا قرب .
والشغلة هي اني قبل اربع سنوات وقع على رجلي زيت مغلي وانا في البيت لما كنت اساعد امي , المهم قرررت اني ما قول لخطيبي عن موضوع الحرق بالرغم انو بمحل حساس بجسدي , مش لاني ما بدي احكيلو ! بس انا كنت خايفة انو يرفضني اول ما يعرف بهيك ايشي باول علاقتنا مع بعض واتلصراحة التشوه الي عملو الحرق كبير وما بينعملوا تجميل لاني رحت واجيت كتير عند اكتر من دكتور وقلولي انو ما بيتصلح .

صورة توضيحية

لما قررت احكي لخطيبي قبل عرسنا بشي شهرين قعدت معو لحالنا وقلتلوا انو انا صارت معي حادثة وانحرقت بمحل حساس ( قلتلو وين ) وتفاجأت انو عصب علي وضربني كف على وجهي وصار يصيح وما قبل يسمع اي كلمة وصار يقلي اني غشيتو وخدعتو وما احترمتوا , واني وحدة كذابي ما بستاهل حبو ..واني كنت بدي اضحك علي وتركني وراح .
انا كتير مضايقة انا نفسيتي تعبت بعد الي صار وبعد ما مد ايدوا علي وضربني ما عدنا حكينا مع بعض لحد اسا ...وانا الصراحة كتير متحيرة كيف غدر يمد ايدو علي ؟ وكيف سمح لحالو يعمل هيك ايشي ؟ ولو انو بيحبني عنجد كان ما فرقت معو حرق او غيرو ...! وبنفس الوقت بحس بذنب اني انا كذبت علي فترة طويلة ! وهل انا عنجد غشيتو وضحكت علي ؟ صح انو هيك ايشي بيأثر على العلاقة بين اي اثنين بس ما بعتقد انو لهاي الدرجة ...ويا ترى ارجعلو واعتذرلوا ؟ او اتركوا لانو ما قدر الي انا في ؟ انا كتير حيرانة وخايفة اني اخسروا وخايفة اني ارجعلو وما يرضى في ميشان الحرق... وخايفة اذا هو ما قبل في وانا هيك مين راح يقبل في غيروا ..؟ وخايفة اني اذا ارجعتلو اعيش معذبة كل عمري ...ساعدوني بحاجة لنصيحتكوا ووجهة نظركوا ....

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il