- أبرز ما جاء في الرسالة:

* صرت احس انو خطيبي مو متل قبل بعصب بسرعه وبتوتر كل ما احكيه

* انا سالتو شو فيك ليش انت هيك تعبان حكالي شوية ظروف ومشاكل بالشغل انا قلت اصبري وتحملي

*  انا مستعده اتحمل واعيش معاك عالخبز والميه شو اعمل لحتى اني اقدر اقنعو نرجع لبعض انا بحبو كتير وبعرف انو هوه بحبني كمان

وصلت الى موقع العرب رسالة من شابة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة هي التالية:

مرحبا انا صبيه من المثلث عمري ١٩ سنه مخطوبة لشب عمروا ٢٤ سنه انا وخطيبي خطبنا عن حب والحمد الله علاقتنا كتير منيحه ومتفقين على كل شي وبينا احترام وحب متبادل مرينا بشوية مشاكل متل اي تنين بس قدرنا نحلها المشكله ابتدت من فترة انو صرت احس انو خطيبي مو متل قبل بعصب بسرعه وبتوتر كل ما احكيه بينفعل بسرعه صرت الاحظ عليه انو عم يتعب كمان انا سالتو شو فيك ليش انت هيك تعبان حكالي شوية ظروف ومشاكل بالشغل انا قلت اصبري وتحملي وصبرت بيوم من الايام اتصلي حكالي بدي احكي معك بموضوع قتللو ماشي لما قعدنا حكالي خلص احنا لازم نترك بعض ما لازم نكمل احنا مو لبعض حكيتلو ليش شو السبب حكالي ما بدي اظلمك معي انتي ما بتستاهلي هيك انت لازم تعيشي وما تنحرمي من الحياة معي حكيتلو طب ليش شو السبب قلي ما بدي اعلقك فيني انا ما برضاها لحالي ولبنات الناس انا انصدمت كتير وقعدت اسبوع مضايقه وعم ابكي.

صورة توضيحية

بيوم اتصلتلي اختو قلتلي بدي احكي معك بشي قلتلها ماشي لما روحت وقعدت معها بتقلي اخي من وقت متركك كتير مضايق وتعبان وقلبو محروق من جوا قلتلها وانا نفس الشي بس هوه ليش ترك شو السبب حكتلي السبب انو من فترة عمل فحوصات بالمستشفى وعرف انو معو سرطان وعشان هيك غصب عنو مو بايدو حكيتلها انا ما رايحه اتركوا لو كل العالم وقفوا ضدي رايحه ظلني معاه اتصلتلو بنفس الليله حكيتلو انا لحد اسا ما شلحت خاتم خطبتنا وانا عرفت بكل شي وبدي منك تعرف اني ما رايحه اتركك واتخلى عنك وانت بهيك ظرف ورايحه اعيش معاك عالحلوة وعالمرة وشو ما بصير عليك بصير عليه بدي اعيش معاك الحزن والفرح الدمعه والبسمه حكالي بس انا ما بدي اعلقك فيني حكيتلو احنا لما خطبنا اخذنا بعض عن حب ومرت علينا كتير مشاكل وقدرنا نحلها سوا معناها فينا نتغلب عهاذ الشي هوه سكت وقلي بس بدي احكي مع الدكتور عشان وضعو وبعدو بنحكي انا حكيت لاهلي وهنه قالولي انو احنا واقفين معاكي وما رايحين نتخلى عنكم انتو التنين وبنساعدكو بعدها بكم يوم حبيبي اتصلي فحكيتلو شو ردك قلي انا ما بدي اظلمك معايه وتتعذبي كتير حكيتلو انا مستعده اتحمل واعيش معاك عالخبز والميه شو اعمل لحتى اني اقدر اقنعو نرجع لبعض انا بحبو كتير وبعرف انو هوه بحبني كمان شو اعمل يا ريت تنصحوني من وقت ما صار هاذ الشي وانا ما عم نام الليل انا ما رايحه اتركوا بس ما بدي ننفصل بشكل نهائي شو بقدر اعمل ساعدوني وشكرا الكو

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il