وصلت الى موقع العرب رسالة من فتاة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية..

السلام عليكم.. أود طرح مشكلتي أمامكم لعلي أجد حلها معكو..بتأمل منكو انو توخدوني على محمل الجد وتساعدوني..  أما بعد: انا شابة عمري 25 تقريبا... كنت التقي بشاب عن طريق الصدفة.. والصدف تتابعت وتتالت.. وصرنا نسلم.. وبعدها نحكي.. وكل ما حكينا اكتر يزيد احترامنا وتقديرنا لبعض.. وبالتالي صار في مودة بينا وكبرت وتطورت وصارت حب كبير.. هاد الحكي تقريبا دام سنتين... وصلنا لمرحلة اللي لازم فيها نتقدم ونخطو خطوة جديدة سوا.. وبالفعل هيك صار.. حكيت مع اهلي انو في شب بدو يتقدملي وانا معنية فيه.. وهون بلشت مشكلتي.. بالاول بابا ما كان عندو مانع.. بس امي ترددت وبعدين رفضت الفكرة.. ضلليت احاول احكي معهن لحد ما اقنعتن او بالاحرى هن فشلوا يقنعوني..  واجا عالبيت.. شافوه اهلي وتعرفوا عليه.. بالتالي اهلي فركشوها.. وصاروا يحاولوا يقنعوني برأيهن.. وصارو يتحججوا بحجج بايخة.. وانو هن شايفين انها اشياء اولية بس انا بشوف انها تانوية ومش سبب كافي او مقنع لرفضهن الو.. مع العلم انو هو شاب كتير مهذب ومحافظ ومتعلم وظريف..
انا بعرف انو هوي بستناني وما نسيني.. واكيد انا كمان مش رح انساه.. بس لا انا ولا هوي عارفين كيف نغير فكرة اهلي.. انا لسا على رايي واهلي نفس الشي.. وصرت حس انو صار في جفا او بعد بيني وبين اهلي بسبب هالمشكلة..
اهلي غاليين علي كتير..تعبو علي وكبروني.. بس من جهة تانية حبيبي برضو غالي علي كتير... وبحسو نصفي التاني.. لهيك ما بدي اخسر حدا منهن...  الله يخليكوا ساعدوني.. كيف ممكن اجمع وأوفق بينهن.. اذا شايفين انو في ايش اعمل.. او هو برضو ممكن يساوي شي.. الله يخليكوا ما تبخلوا علي باقتراحاتكو .. وتحياتي الكو.. 

موقع "العرب" يوجه عناية الزوار الى انه بامكانهم ارسال مشاكلهم وتساؤلاتهم الى الموقع لاخد رأي الزوار فيها على alarab@alarab.co.il