أصلا عادي
لما الناس تنام بالدفى
وطفل غزة يبكي بالخفى
وصوت المدفع لحن عليه غفى
تمنى تكونلو فرشة ولو كانت سجادة
أصلا عادي
شتت بالعالم مية
وشتى سوريا صواريخ زخت من غيوم بشرية
والقتلى فوق المية
مشيو بدرب الشهادة
أصلا عادي
لما يطلعولك بالتلفزيون
رقصلي هناك وغنالي هون
وتتعب من قعدة الصالون
وتوهم حالك بالسعادة
أصلا عادي
مات الضمير
والبريء أسير
وإنتست قصة التحرير
مهو من أصلو إنتست بلادي
أصلا عادي
العيلة المستورة
بدها خبزة بدها طبخة أو حتى كيلو بندورة
كلو غلي إلا الإنسان عم يوصل حقو تحت الصفورة
بتخبى ورا أواعي السيادة
أصلا عادي
ترفع إيدك وتقولي سلام
ع أرض الواقع مش بالأحلام
ونعيش بهدوء مسيحية وإسلام
مش لما تعرف ديني تغير المحبة لإضطهادي
أصلا عادي
مهو الفوتبول صار الحكم
وإيللي بيني وبينك بتوقف عند رقم
إن زاد أو نقص يمكن الأخوة تنعدم
غلبتني بكرهك أغلبك إنت تكرهني بزيادة
أصلا عادي
غفيت اليوم وبعيوني خوف
يمكن يقصفونا بالمولوتوف
أنا الغزاوي تعال وشوف
وبصرخة مذبووح بنادي
أصلا عادي
 موقع العرب يفسح المجال امام المبدعين والموهوبين لطرح خواطرهم وقصائدهم التي كتبت بقلمهم المميز ويقدم للجميع منبرا حرا في التعبير عما في داخلهم ضمن زاوية منبر العرب. لإرسال المواد يرجي إرفاق النص في ملف وورد مع اسم الكاتب والبلدة وعنوان الموضوع علي العنوان: alarab@alarab.net