مِشتاق أطلع
مِنْ ذاتي نْهار
وَنْفُض زَماني
مِثِل كوم غْبار
بُركان أعزُق
عا هَوا الفَنار، ...
وْساوي نِحمي بِزْ
للسِّيجار!!
مَوْقَف لَمَركَبتي
أعمَل الأنهار!! ..
***
جايي عّ بالي أزرَع
بْكانون
شَمْس تِحرِق بِالهوا
لِغصون
وِيْسود مَحَلّ الحِكْمِه
لِجْنون، ...
أيَّامي أخْبِزها
فِ الطَّابون
مَ يْعود يِطلَع زَهْر
في آذار ...
مِنْ شان خَلِّص هيك
عَ الأشرار!! ...
***
تْمَرجَحت في ليلي
عَ خيط النِّجْم
أطوي بْسَمايي الغيم
بيدي لِمْ
أسرار كوني بْهَجعِتي
بْهَالحِلْم
وَارْسِم جَدايِل بِلْدِتي
بِالنَّار!! ...
***
بْتِذَكَّري يوم غُصنا
في غُمْق البَحْر
كيف كُنتي تُقطُفي
مِ الحَوَّامات زَهْر
وْتُنقُشي
عا صَفْحِةْ الموجات
بَدْر
قَهْوِتْنا نِشْرَب
مع الحوت الجار!! ...
***
بِدِّي يِجري النَّهْر
عا كيفي
وَاسْحبو للخَلْف
في سيفي
وّاعْمل شِتايي
عا هوى صيفـي
عاصِمْتي جَرجِرها
عا ريفي
في عيني مَ تْساوي
تَعريفِه*، ...
يا ريت بَدِّلْها
بْكَمْشِةْ قُنَّـار!!
-------------------------
*التَّعريفة: عبارة عن نصف قرش، وهي عملة غير متداوله اليوم.
 

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوانalarab@alarab.com