الأكثر قراءةهذا الأسبوع
آخر تعديل: الخميس 28 / مارس 21:01

ديروا بالكوا على عالبلد.. لكل اخوتنا الطلاب

بقلم: كامل قاسم شعبان

امل قاسم شعبان
نُشر: 26/03/20 19:59,  حُتلن: 20:36

الشباب والصبايا الي عم يرجعوا من خارج البلاد، ياريت تتفهموا الموضوع .. الموضوع مش سهل وخطر كثير. لما انت راجع من بلاد الفيروس فيها منتشر وما بتعرف اذا كنت انت حامل هالفيروس او لا المفروض تتقيد بالتعليمات وتعزل نفسك عن الناس مدة 14 يوم.
وبما انه غالبية الطلاب اختصاصهن طب، من المفروض تكونوا انتوا أدرى الناس بخطورة الوضع وجديته والمفروض انتوا اللي توعوا الناس وتنصحوهن يلتزموا بيوتهن ويلتزموا بفترة الحجر اللازمة.
بنفعش ترجعوا لهون لانكوا منهزمين من خطورة الوضع برا، وتيجوا ع بلادنا تطفشوا كانه الحياة ماشية بشكل طبيعي.
هاي التصرفات بتدل على الاستهتار وعدم المسؤولية. عيب. اذا مش خايف ع جيرانك وأصحابك وأهل بلدك، خاف ع أهل بيتك. خاف ع امك، ع أبوك، ع أختك، ع سيدك وستك اللي مناعتهن مش بقوة مناعتك ولا جسمهن بتحمل زي ما جسمك بتحمل.
منرجع منقول يا ريت كل شخص يتحمل مسؤولية حاله ويتقيد بالتعليمات اللازمة. بلاش تكون شخص فاسد لبلدك ولوطنك ولمجتمعك
ورجاء خاص لكل شخص بعرف حدا من الاشخاص اللي راجعين من السفر يأكد على انهن يلتزموا بالتعليمات. اذا بتعرف انه في شخص مستهتر ومش عم يتعامل مع الموضوع بشكل جدي، حاول انت اتحمل مسؤولية عنه وحاول وعيه واجبره يقعد ببيته ويلتزم التعليمات.
منعرف انه مش سهل انك تسكر ع حالك مدة 14 يوم او مدة أطول، لكن ما باليد حيلة. مجبورين كلنا نتحمل المسؤولية ونساهم قدر المستطاع بتقليل نشر الفيروس وتفاديه عشان السلطات المسؤولة تقدر تسيطر ع المرض ونقدر كلنا سوا نطلع من هالمحنة بخير وسلامة وبأقل أضرار ممكنة.

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.com 

مقالات متعلقة