بِدنا نعيـــش بحُرِّيِّـــة
ما بِدنا حرب وبارود
بِدنا العيشِـــة الهَنِـــيِّـة
وسعادِة ما إلها حــدود
____________
كُل الِمعامَـلِـة بالعُنــف
ما فيها محبِّة ولا لُطف
لا تخَلّوا الِقلــوب تجِفّ
وتِبقَى صحرا بِلا ورود
____________
ليه تَنِحــرِمِ الأطفـــال
وبَعِدهُم مِثل الأشتــال
ما يصبحوا بُكرَة رجال
وما يكونوا أهِل وِجدود
____________
حَتّى الإخوِة مِش إخوِة
ماتـــت فيــهُم النَّخــوِة
بَــــدَّلوهــــا بالقَـــسوِة
وبالدّمعاتِ عالِخـــدود
____________
وين الدّينِ والإيـــمان
وينِ الرَّحمِة يا إنسان
وَصّانا الرّبّ الرّحمان
عالمحبِّة لا الصُّـــدود
____________
بالعلاقَـــة الحميـــمِة 
بتِشفَى قلوب السّقيمِة
وبالأخلاقِ القَويــــمِة
بتبني محبِّة وِعــهود
___________
والإنسان أخو الإنسان
والبشر كُلهُم إخــــوان
خَلِّ الغضَب للنِّسيـان
والرّحمِة بِتشِدِّ زنــود
___________
نحنا في الحقّ سوِيِّة 
باختــِلافِ الــهَوِيِّـــة
إســـلام ومسيــحيِّــة
أوْ كُنتو دروز ويهود 

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.com