بَعْد التّشريد اللي صار
والهجمِه هَالوحشيّه
ما خلّو ساحه وْلا دار
شو ضِعْنا في البريّه
بين عشيّه وِنْهار
عِمْلونا إرهابيّه
صُرْنا أغْراب بْهَالدّيار
هويّتْنا مشطوبِه!

عْمامي صَفّو في لبنان
خْوالي صاعو في الحولِه*(1)
وْلادي مَ دْري في عمّان
يا صارو بْأيّ جولِه..؟!
واللي يرجع عّ الأوطان
مُتّهِم من هَالدّولِه
مِتْسلّل*(2)، من هَالسّجان
يِتْخبّي بْشي زاروبِهّ!!

***
عِدّي رْجالِك عِدّي..!!

هَالأرض إلْ بِقْيت معنا
بالشّقا مزروعة
مَ تْعوّض عن وجعنا
يا روحي الموجوعة
حتّى الطّير ما غنّى
حاسس في هلاكي
يسألني عن وطنّا
في هَالفجْر الباكي

ما نعرف شو نستنّى
بَعِد هَلِمْصيبِة
أهلي تّشرّدو عنّا
حالتنا غريبِة
ما في دْروب تجمعنا
ولا نجمِه تِهدي
مّلوك العرب تخدعنا
عِدّي رْجالِك عِدّي..!!

يلا نزرع هَالسّهلِه
من أرضي المنهوبِه
نسقي شجرات التّلّه
والمرجِه المنكوبِه
خلّي الدّمعات تْوَلّي
عن عيني المعصوبِه
عَلّي هــاماتك عَلّي
العزيمِـه مطلوبــِــه

1) الحوله: سهل الحولة، سهل زراعي وسط سورية، يقع بين محافظتي حمص وحماة
2) مِتْسلّل: العائد إلى وطنه الذي رُحّل عنه سنة الـ 48. اعتبرته السّلطات الإسرائيليّة متسلّلا وخارجًا عن القانون.
(من المسرحيّة الشعريّة "بنت القسطل" (صفورية) التي ستصدر للشاعر قريبًا)

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net