بِالسّلمِ منِفتَــح الِحْدود --- منِتْصالَح مع الجيــــران
سلاحنا ماهُوِّ البارود --- هُــوِّ محــبِّـــةِ الإنـســان
__________
في السّلمِ منِرفَع بُنيان--- والأرضِ زْهور بْساتيـن
بالحُبِّ ما في عِصيان--- وِقْلوبِ بتِهدي الحنيـــن
وِالصّحرا بتِقلِب بُستان---والقــاسي قلبُــه بيلــيـن
منِتصالَح معِ الرّحمان--- ومِنّو بيِهدينا الغُـفــران
__________
السّلِم نِعمِه وراحِة بال--- لَمّا تعيشُه راح بِتسـود
بتِتغَيَّر كُــلّ الأحــوال--- بالسِّلمِ بيِخضَرِّ الـعــود
بتِبقى العيشِه عال العال---لا حاسِد ولا مَحـسـود
لا في قيل ولا في قال --- بِتعيش العُمْـر بأمــان
___________
وِالسِّلـمِ بسمِـة الِخْدود---فرحَـه بِتْـطُــلّ بعَيْنَــيْن
وِالِخْدود تِزهِر ورود---وبِتعيش العُمُرعُمـرَيْن
ما مِنعود نِسمع بارود--- منِسمع غِنوِةِ القلبَيْـن
وِالعَزِف عَاوْتارِ العود---وِالقلبِ بيبقى طَربان
__________
السّلْمِ بْتِعمَر ساحاتُـه--- وبِالأفـراح تْعَــمِّــرنا
لَمّا منِرفــع رايـاتُــه--- رحمِة رَبّي بتُغمُــرنا
وبِتْعَطّرنا نَسماتُــــه--- طيور الحُبِّ تْسامِرنا
وِمْنِتــهنّـى بلَــذّاتُــه--- بِتقوم الصُّبح فرحـان

المكر

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net