زجل فاقد الشيء لا يعطيه بقلم :اسماء طنوس المكر
تَتْكون مِثال البَيّ وِتْرَبّي عالأُصول
وتزرع بُذور الأدب وِتْجَمِّل اوْصافُه
عليك أنتَ تكـون بالخُــلِق مَصـقول
تَيِطلع إبنَك بالمِثِل وِسلوكُه ما تخافُه
ولَوْ ما حدى حبّيت وقلبك بيظَلّ مغلول
كيف بيكون الإبن والحُــبّ ما شـــافُه
لَو فيك صفات الغُشّ مِنَّك ما هو مقـبول
تُطــلُب أمانِـــة حَد وانتَ باختــلافُـــه
أوْ لَفظَك القاسي جرَح عَنّوإنِت مســؤول
لا تلــوم أيَّ حَد لَوْ نَطـــقَتِ شفــافُـــه
ولَوْ ما احترَمتِ الأهل مِنَّك ماهو معقول
تلوم حدا منِ الغيـر لَوْ دارلَكِ اكتـــافُه
واللّي قلبُه من حجر والحِسّ فيه مشلول
راح يكرهوه النّـاس ويِبـــعِدوا خــرافُه
ورايحين يقــولوا عَنّــو بالغَبــا مـجـبول
فارغ منِ الإحساس وعامايـْلُه عافــوا

زَجَل عِندَك مَحَبِة
يا بابا عِندَك قَلب شو بيحِنّ
عِندَك مَحَبِّه دوم تِعْطيها
رِقِّة حَنانَك بقلبي عَم بِتْرِنّ
ما بتِنْتَسى وقلبي مِخَبّيها
-------
وﭐنْتَ يا بابا شِلْت عَنّي هْموم
لَمّا الِهْموم عَليك حَطّيتا
وما قَصَّرِت مِن واجبي ولا يوم
وكُل المَطالِب إِنتْ لَبّيتا
-------
بابا إنتَ لي عِزّي وِجاهي
وعِندَك شَهامِه بَفْتخِر فيها
وْلَو مَرّه ﭐنْعَوَج دَربي وِﭐتِّجاهي
نَصَحتْني هَالدَّرب ما ﭐمشيها
-------
ألْقيت أُذني ليك حَتّى أسمَعَك
وَﭐحْفَظ بِقَلبي ﭐسْرار تِحكيها
يا اللّي بقلبي وِفِكري أنا بَفْهَمَك
تِبقى المَحَبِه بقَلبي مِخَبّيها
-------
عُمرَك يا بابا ما رَفَعْتِلّي العَصا
ولا ﭐحْوَجْت نفسي حدود أعَدّيها
وقلبي اللّي طاوَع ما مَرَّه عَصى
كَلام عينيك بَفهَم مَعانيها
-------
وﭐنتَ المَحَبِّه اللّي ما إِلها حدود
وِسْع الدِّني بكُلّ ما فيها
حَبْلُ المَحَبِّه سِلْسِلِه مْنِ جْدود
أعْطاك بَيَّك وصِرْت تِعْطيها
-------

زَجَل بَيّي بَحِبَّك 
بَيّي بَحِبَّك قَدْ ما فِيِّ
وِالدّار بتِبْقى فيك مَحْمِيِّه
بِوْجودَك مَعانا البيت مِتْعَمَّر
وِبْحِسّ فيك بِأمان وحِنِّيِّه
-----
وِالأب كِلْمِه في الدِّنْيي مُنى
مكتوبِه مِن حَرْفين أَوَّلْهُم أَنا
وِالأَلِف وِالباء يَعْني أَنا بْحِبَّك
ولَوْ ما كُنْت إِنتَ ما كُنِت أَنا
-----
وِﭐنْتَ يا بابا شْقيت وعَمَّرْت لِنا الدّار
ورَبّيْتنا نِحْنا لَمّا كُنّا صْغار
لَاجْلِنا ضَحّيت وما قَصَّرِت مَعَنا
وزَوَّدْتنا بِعْلوم تَصِرْنا كْبار
-----
وِﭐنتَ يا بابا شَجْرَة الأَثْمار
وإِيديك يا اللّي تِعْبوا جَنوها
وياما تْعِبِت واجَهْت مِن أَخْطار
الدّار سِلْمَت باللّي بَنوها
-----
كبِرْت أَنا وِنْجِحْت مِن رِضاكَ علَيّ
وكُنْت إِنتَ لي نور وضَيّ
وما مَرَّه جَرَحْني كَلامَك ولا قِسي
وأَحلى الكَلام إِنتَ زْرَعْتُ فِيّ
-----
وِﭐنتَ يا بابا قُلْت لَأُمّي
عينيكِ عَالْأَوْلاد إِهْتَمّي
عَلِّميهُم لَبِّسيهُم هَذِّبي
وإِن بِكي طِفْلِك عَصَدْرِكِ ضُمّي
-----
 

 موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net