زجل اللّه نَزَّل رحمِتُه

لمّا النّبي إيلِيّا صَلّـى تيـنزِل مَـطَـــر
رب السما استجاب من صِدقِ إيمانُه
مِن هون إفهموا العِبرَه ياجِنسَ البشـر
إنُّه اللّي بُطلُب بإيمان بينال طلبـاتُـه
اللّه ما بَدّو قــلوب قاســيَه كالــحـجــر
كُل مين طلــب مِنّو لَبّـالُـه حاجــاتُــه
واللّي ما عندُه صِلَه بالرّب حياتُه قَفر
راح يكون خسران أغنَى عَطِيّــاتُـه
واللّي بيرجع إلو ندمان لِذنوبُـه غَفَــر
بالتّوبِـه والصّلاه مع صِــدقِ نِيّــاتُه
اللّه بيشَــتّي عالمُــؤمــن واللّـي كَـفَــر
والشّمس علينا بتِضوي من سماواتُه
عَلّمَ النّـاس دربُـــه وراحــوا للخطــر
لِنُصحُه ما سِمعوا ولا قِبلوا طُرُقاتُـه
اللّـه الرّحيــم برحمتُــه عــاوَد جَــبَر
عَطَف علينا الخــالِق مِن طولِ آناتُـه
شوفوا الإله ورحمتـُــه قَدّيــه صَــبَر

 موشحات عيون الورد

يا وَرد ياللّي ضِحكِتَك بَلسَم عليل--- خلّيك بهالضِّحكِه لِأيّامِ وسِــنيـن 
فرحِة عيوني بنظرِتَك هِيَّ الدّليل--- ومن دونِكَ بالقلب زَفرات وأنـين
انتَ سبب فرحِة وُجودي وِالسَّعِد --- من دونِكَ ما بلاقي أفراحي بَـعِـد
وانتَ اللّي في البسمِه بتِرسِملي وَعِد
 ***************
إطبع عَوجهي ضِحكِتَك حتّى تِطول---خَلّيني أضحكها بِأصواتِ ورنـين
قلبي أنا العطشان عَم يُطلُب بيقول --- بَدّو مِنـكَ الرِّقّــه ال فيـها حــنـين
مِنكَ أخَـذتُ العِبــرَه تَعيـش بأمَـل --- وما أرضى لي بالعَيشِ مَرَّه بالملل
وأسعى لِرَسمِ البسمِه وما يصيبني خَلَل
 ***************
ولَمّا بَتصبّح فيك بيِضحكلي النّهار---بيكون شُعوري غير يا وَعدي الأمين
لَو غِبِت عن عيوني يوم راح أنهار---والنهار رايِح يِنقِلِب لَو غابوا العينين
مَتِّـعني باللّفتــات يا أغلـى حبــيب ---فيها أنا عَـم حِس مِنّي انــتَ قريـــب
وراح لاقي فيك القلب إنُّه مِش غريب

زجل للخير بيعمل ربَّك 
لا تْخَلِّ فكرَك مشــغول___ وِمكَشِّر دايماً عَطول
قلبَك في البسمِه بيِرتاح___ مِثلِ الدّوا مِش معقول
_____________________
سَلّــِم رَبَّـــك المفتــاح ___ تَتُـشــعُر انــتَ بأمــان
بتمشي في دَرب النّجاح___ وبيِضحك لِكِ الزّمـان
بِتقوم عَبســمِة صـــباح___ وعَنَغمِــة بُلبُــل كمـان
يـا رزّاق ويــا فـتّـــاح ___ الدّاعي رَبُّه راح ينول
______________________
لَوْ قلبَك دايماً مضغوط ___ راح يـعمـل لِتدمــيرَك
في الأملِ انتَ مغبوط ___ لا تِرضَ بِتَـــعكـــيرَك
شَغِّل عَقلَك عالمضبوط ___ تَينَـــوِّرلَـك تـِـفكـــيرَك
ولَوْ كان الفِكِـر مَغـلوط ___ راح تِبقى واقف مشلول
_______________________
قَــوِّ قلبَـــك بالإيــمــان ___ ألـلّه بــيسَـــهِّـل دَربَـــك
بِتلاقي عِنــدُه الأمـــان ___بـغَيْرُه ما بيِشــفَى قلبَـــك
لا تْكون على شي نَدمان ___ للخــيرِ بيِــعمَل رَبَّـــك
ما بيخَلّيـــكِ بــحِرمــان ___ عنـدُه الــدّوا لِلمَـعـلــول

  موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net