أبرز ما جاء في الرسالة:

تعرفت على ابن الحلال اللي بحبني وبقدسني وهو كمان ابن عيلة وناس

خطيبي راح ما ينجلط ولدرجة قللي او بتتبري منها ومنتجوز او انا مجبور افصل الخطبة مع اني رح اضل احبك

اللي ما الو حظ بالدنيا لا يتعب ولا يشقا لانو ممكن اخسر حبيبي وخطيبي لسبب أنا الضحية فيه ومش متعلق فيي بصورة مباشرة

يا جماعة امي مرا مطلقة ومن فترة تعرفت على زلمة اكبر منها بأكمن سنة وشكلهن مصاحبين بعض، بس الظاهر هاد الزلمة غيرها للأسوأ لانها صارت تشرب نبيذ وكحول

وصلت الى موقع العرب رسالة من شابة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة كالتالي:
مرحبا أنا صبية عمري 27 سنة متعلمة ومثقفة وحياتي كتير حلوة ونشكر الله اني تعرفت على ابن الحلال اللي بحبني وبقدسني وهو كمان ابن عيلة وناس وانا وهو متفاهمين على كلشي بس للأسف اللي ما الو حظ بالدنيا لا يتعب ولا يشقا لانو ممكن اخسر حبيبي وخطيبي لسبب أنا الضحية فيه ومش متعلق فيي بصورة مباشرة.

صورة توضيحية

يا جماعة امي مرا مطلقة ومن فترة تعرفت على زلمة اكبر منها بأكمن سنة وشكلهن مصاحبين بعض، بس الظاهر هاد الزلمة غيرها للأسوأ لانها صارت تشرب نبيذ وكحول على الفاضي والملان واذا بحاول احكي معها بتعصب وبتصير تشرب زيادة. انا يئست الوضع يعني ست مطلقة مفروض تفهم انو العيون عليها بس للأسف صارت سمعتها بالأرض وهاد الاشي بلش يأتر على علاقتي بخطيبي. 

النجدة
آخر مرة كان عنا خطيبي امي كانت سكرانة وحتى صاحبها كان عنا وبلشت تزت حكي لخطيبي وتتخوت بالتصرفات وسامحوني بحكي هيك عن امي بس بدي افهمكو شو الوضع. خطيبي راح ما ينجلط ولدرجة قللي او بتتبري منها ومنتجوز او انا مجبور افصل الخطبة مع اني رح اضل احبك. السبب كمان اهلو بضغطو عليه، وهو معه حق بصراحة صعب يوخد وحدة سمعت امها مش منيحة، بس أنا شو دخلني؟ كيف بقدر ألاقي حل؟ كيف بقدر احافظ على خطيبي بدون ما اتبرأ من إمي؟ يا ريت تساعدوني! وسامحوني.

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il