الأكثر قراءةهذا الأسبوع
آخر تعديل: الثلاثاء 19 / مارس 09:01

تَرْنيمِه للإله بَعْلْ/ بقلم: سيمون عيلوطي

سيمون عيلوطي
نُشر: 18/08/21 10:28,  حُتلن: 10:59

سَكَّر باب الليل القَفْلْ
في زَمَن الكورونا المَحْلْ
ساد الخوف وين ما حَلْ
صَلَب النِّجمِه ...
أربَك حِلمي...
اغتال البَسمِه
خَبَّا قَمَري ما عاد طَلْ
ويــنَك يا الإله بَعْلْ*؟؟!
شوف صْحابَك ...
وِجْهِ حْبابَك ...
أصفر، ريقْهِن ما يِتْبَلْ!!
***
ويــنَك يا الإله بَعْلْ؟؟!
حابِس قَلبي
جُوَّا عِلْبِه
هّمُّه مْخّبِّي
عن هَالصُّحبِه
بْخِربِه زغيرِه هيكي ظَلْ
ما عاد يِمْرَح
ما بِتْفَسَّح...
فِكْرو تْمَرْجَح، ..
تَنُّو مَلْ
اسأل عَنُّو ...
حْبابُو وَنُّو ...
حَنُّو وْجَنُّو
بِدهِن حَلْ
ويــنَك يا الإله بَعْلْ؟؟!
***
صُرنا نِبعَتلَك دَعوات
دَغْشِه نْرَنِّم تَرنيمات
تًنْها الإلاهة عنات*
تَتْحَنِّنلَك قَلبَك لِكْبير
بَلْكي عَ الصُّبِح بكِّير
تِرْمي هَالفيروس بِالبير
وِنْشوفو من عِنَّا فَلْ...
ويــنَك يا الإله بَعْلْ؟؟!
---------------
* الإله بعل: هو أحد أهم الهة الكنعانيين التي قدَّسوها وبجَّلوها باعتباره إله الخصوبة، وقد عُرف عالميًا بإله المطر، وكان أحيانًا يُسَمَّى رب الأرض لارتباط اسمه بالخصوبة والأرض.
*عنات: آلهة الحرب والقوَّة، وهي أخت الإله بعل.


 

مقالات متعلقة