ساحات أَعبُر مِنْ
وَرا ساحات
كُلْ ساحَه إلْها
"صَدَى حْكايات"
مِنْها تُمرُق مِثِل
لَمْحات البَصَر
مِنْها تِترِك بِالقَلِب
صورِةْ قَمَر
مِنْها أَقسى مِنْ حَجَر
عا هَالبَشَر
مِنْها أنعَم مِنْ حَرير
غَزْل البَنات
مِنْها بِتْعود بْحَلاوِةْ
ذِكرَيات
يا بْغَصَّه مِثِل
غَصَّات الآهات
وْفي ساحَه لَحْتِجاج
الحَرَكات
إِلَّا ساحاتِك إِنِتْ..
فيها أَنسى الخَطَوات...!!
***
أُوكَازيُون ...
حاكِم مارِق عَ البَيارِق ..
واهِم نَفسُه
عَ كُلشي يْمون
بالمَطارِق... بالمَحارِق
بِدُّو يْسَطِر عا
هَالكون
يُؤمُر، يِنهي ... شَعبُه
يِلهي ..
فْ لُعبِة تَشكيل
المَعجون
ساهي نايِم، شِكلو عادِم
من تَعاطي هَالأفيون
حُكمُه جايِر ...
عَرشُه بايِر ..
عزِّ تْرابُه عَليه يْهون
"اليورو" ربُّه ...
يْعَبِّي بعُبُّه ..
ثروِةْ مِليار المَليون
يُطبُخ يِعجِن ...
بُكرَه يِعلِن ..
بيع بْلاده بْأوكَازيُون..!!